ବଦଳିବ ନାହିଁ ନ୍ୟୁଟ୍ରାଲ ଅମ୍ପାୟର ନିୟମ

0
4

ଲଣ୍ଡନ,୧୩।୮(ପି.ଟି.)- କ୍ରିକେଟରେ ନିୟମ ପ୍ରସ୍ତୁତକାରୀ ଏମ୍‌ସିସି (ମାରିଲେବୋନ କ୍ରିକେଟ କ୍ଲବ) ଟେଷ୍ଟ ମ୍ୟାଚ୍‌ରେ ନ୍ୟୁଟ୍ରାଲ ଅମ୍ପାୟର ନିୟମକୁ ସମର୍ଥନ କରିଛି। ଆଶେସ ସିରିଜ୍‌ର ପ୍ରଥମ ଟେଷ୍ଟରେ ଦୁଇ ନ୍ୟୁଟ୍ରାଲ ଅମ୍ପାୟର ଅତ୍ୟଧିକ ଭୁଲ ନିଷ୍ପତ୍ତି ନେଇଥିଲେ। ଓ୍ବେଷ୍ଟଇଣ୍ଡିଜ ଅମ୍ପାୟର ଜୁଏଲ ଓ୍ବିଲସନ ଓ ପାକିସ୍ତାନର ଅଲିମ ଦାର୍‌ଙ୍କ ୧୦ ନିଷ୍ପତ୍ତି ଡିଆରଏସ୍‌ ଦ୍ୱାରା ଉଭୟ ଇଂଲଣ୍ଡ ଓ ଅଷ୍ଟ୍ରେଲିଆ ଦଳ ବଦାଇଥିଲା। ଫିଲ୍ଡ ଅମ୍ପାୟର ଆହୁରି ୫ଟି ତ୍ରୁଟିପୂର୍ଣ୍ଣ ନିଷ୍ପତ୍ତି ନେଇଥିଲେ, ଯାହାକୁ ରିଭ୍ୟୁ କରାଯାଇ ନ ଥିଲା। ଏହାପରେ ଅଷ୍ଟ୍ରେଲିଆ ଦଳର ସହାୟକ କୋଚ ତଥା ଏମ୍‌ସିସି ସଦସ୍ୟ ରିକି ପଣ୍ଟିଂ ନ୍ୟୁଟ୍ରାଲ ଅମ୍ପାୟରଙ୍କ ନିୟମରେ ପରିବର୍ତ୍ତନ କରିବା ଲାଗି ସୁପାରିସ କରିଥିଲେ। ଗତ ମ୍ୟାଚ୍‌ ଯୋଗୁ ନ୍ୟୁଟ୍ରାଲ ଅମ୍ପାୟରଙ୍କ ନିୟମ ଦୃଷ୍ଟିରେ ରହିଛି। ଟେଷ୍ଟ ମ୍ୟାଚ୍‌ରେ ଘରୋଇ ଅମ୍ପାୟରଙ୍କୁ ନିଯୁକ୍ତ କରିବାକୁ ପଣ୍ଟିଂ ସୁପାରିସ କରିଥିଲେ। ଏହାକୁ ଆଇସିସି କ୍ରିକେଟ କମିଟିରେ ମଧ୍ୟ ଆଲୋଚନା କରାଯାଇଥିଲା। କିନ୍ତୁ ଏପର୍ଯ୍ୟନ୍ତ ନ୍ୟୁଟ୍ରାଲ ଅମ୍ପାୟର ନିୟମ ଦ୍ୱାରା ଭଲ ସଫଳତା ମିଳିଥିବା ଏମ୍‌ସିସି କ୍ରିକେଟ ମୁଖ୍ୟ ଜନ ଷ୍ଟିଫେନଶନ କହିଛନ୍ତି। ବର୍ତ୍ତମାନ ଅମ୍ପାୟରଙ୍କ ଏଲାଇଟ ପ୍ୟାନେଲରେ ସ୍ଥାନ ପାଇଥିବା ୧୨ ମଧ୍ୟରୁ ୭ ଜଣ ଇଂଲଣ୍ଡ କିମ୍ବା ଅଷ୍ଟ୍ରେଲିଆର ରହିଛନ୍ତି। ଅମ୍ପାୟରିଂ ସ୍ତରରେ ଉନ୍ନତି ଆଣିବାର ଆବଶ୍ୟକତା ଅଛି। ଲଡର୍‌ସଠାରେ ଅନୁଷ୍ଠିତ ଦୁଇ ଦିନିଆ ଏମ୍‌ସିସି ବୈଠକରେ ଏମ୍‌ସିସି ଅଧ୍ୟକ୍ଷ ମାଇକ ଗଟିଂ, ଷ୍ଟିଫେନସନଙ୍କ ସହ କମିଟି ସଦସ୍ୟ ଶେନ ଓ୍ବର୍ନ ଓ କୁମାର ସଙ୍ଗକାରା ଯୋଗଦେଇଥିଲେ। ଆଇସିସି ଏଲାଇଟ୍‌ ପ୍ୟାନେଲରେ ଅମ୍ପାୟରଙ୍କ ସଂଖ୍ୟା ବୃଦ୍ଧି କରାଯିବା ନେଇ ନିଷ୍ପତ୍ତି ନିଆଯାଇଛି। ଉଲ୍ଲେଖଥାଉ କି, ଦିନିକିଆ ଓ ଟି୨୦ କ୍ରିକେଟରେ ଜଣେ ଘରୋଇ ଦଳର ଅମ୍ପାୟରଙ୍କୁ ପରିଚାଳନା ଦାୟିତ୍ୱରେ ରଖାଯାଏ।

.